Croeso i Ysgol T Llew Jones
Croeso i wefan Ysgol Gynradd Gymunedol T Llew Jones. Ein bwriad wrth gyflwyno’r wefan yma yw rhannu gwybodaeth a chyflwyno ein nod ac amcanion fel ysgol. Ceir gwybodaeth am nifer o bethau sydd am gynorthwyo’r ysgol i redeg yn effeithiol a chynorthwyo’ch plant i ymgartrefu a mwynhau eu cyfnod gyda ni.
Mae addysg yn bartneriaeth tair ffordd gyda’ch plentyn y chi fel rhieni a ninnau fel ysgol. Mae eich rhan yn eithriadol o bwysig os yw eich plentyn am fanteisio yn llawn ar yr holl brofiadau a gyflwynir yn yr ysgol. Ni ellir pwysleisio pa mor bwysig yw eich cefnogaeth chi yn y cartref os yw eich plentyn am gael yr addysg orau.
Cofiwch fod croeso i chi gysylltu â’r ysgol unrhyw amser os oes gennych unrhyw gwestiwn am ddatblygiad eich plentyn.
Yn ddiffuant,
Rhian Lloyd
Pennaeth
Llwybr llwyddiant, lles a llawenydd.
“Ni biau yfory.”
Ein hysgol
Lleolir ein hysgol ym mhentref gwledig Brynhoffnant, Sir Geredigion, a gwasanaetha’r pentref ac ardaloedd Rhydlewis, Glynarthen Pontgarreg, Blaenporth a Penmorfa. Derbynia’r ysgol ddisgyblion yn rhan amser i’r dosbarth meithrin yn dilyn eu penblwydd yn dair oed ac yn llawn amser i’r dosbarth derbyn yn dilyn eu pen-blwydd yn bedair oed.
Dynodir yr ysgol yn ‘Ysgol cyfrwng Cymraeg’ yn ôl polisi iaith yr awdurdod addysg; golyga hyn mai’r Gymraeg yw prif gyfrwng gwaith a bywyd yr ysgol ond anelir at sicrhau bod y disgyblion yn gwbl ddwyieithog erbyn iddynt drosglwyddo i’r sector uwchradd.
Bod yn ysgol gynhwysol drwy:
- Gynnig cyfle cyfartal i bawb heb wahanu o ran crefydd, hil, gallu, diwylliant, rhyw ac oedran.
- Sefydlu perthynas waith da gyda disgyblion, rhieni, staff, llywodraethwyr a’r gymuned.
- Barchu ac ennill parch
- Ddathlu, cofleidio a gwerthfawrogi amrywiaeth.
- Fabwysiadu polisi drws agored.
- Werthfawrogi pob person fel unigolyn.
Byddwn yn herio i lwyddo drwy:
- Greu amgylchedd dysgu ac addysgu sydd yn hyrwyddo ac ysgogi pawb.
- Osod targedau uchelgeisiol
- Ymdrechu i gyrraedd llawn potensial.
- Ffocysu ar ragoriaeth.
- Fwynhau her, dathlu a rhannu llwyddiant.
Creu amgylchedd ysbrydoledig gyda’r plentyn yn y canol sydd yn annog plant i fod:
|
|
Dathlu a hyrwyddo ein hiaith a diwylliant drwy:
- Ennyn brwdfrydedd ac annog parch.
- Greu ymwybyddiaeth o hanes y wlad, ei datblygiad, cartrefi, bwyd, dillad.
- Ymweld a lleoliadau hanesyddol a diwylliannol.
- Hybu adnabyddiaeth o gerddoriaeth ein gwlad- Alawon traddodiadol, gwerin, emynau corawl a dawns.
- Barchu a hyrwyddo ei thraddodiadau drwy eisteddfodau, cyngherddau a dathliadau.
- Gymryd rhan yng ngweithgareddau’r Urdd.
- Fwynhau a chreu celfyddyd. Gwahodd arlunwyr, actorion a beirdd i fod yn rhan o fywyd yr Ysgol.
- Gymryd rhan mewn dathliadau blynyddol a chystadlaethau lleol a chenedlaethol.
Dyddiadur
Diogelwch ar y wê
Prosbectws
Llythyron
Bu'r disgyblion a staff yn mwynhau cefnogi Diwrnod Plant mewn Angen heddiw mewn pyjamas a gyda gwallt gwyllt! Diolch i'r Cyngor Ysgol am drefnu'r diwrnod, ac i Rian o Gaffi Tanygroes am y cacennau blasus. Diolch o galon i bawb a gyfrannodd mor hael at yr achos. Rydym yn falch iawn o gyhoeddi ein bod wedi codi £289.30 i Blant mewn Angen. Diolch am eich cefnogaeth! --------- The pupils and staff enjoyed supporting Children in Need day today, wearing their pyjamas and having wild hairstyles! Thank you to the School Council for organising the day, and to Rian from Caffi Tanygroes for the delicious cakes. Many thanks to everyone who contributed so generously to the cause. We are delighted to announce that we raised £289.30 for Children in Need. Thank you for your support!
13.11.2026 Yn sgil problemau gyda gweinyddwyr Microsoft nid ydym ar hyn o bryd yn derbyn unrhyw ebyst na chwaith yn medru cael mynediad i negesuon sydd wedi'u gadael ar beiriant ateb yr ysgol. Mae ffôn yr ysgol yn gweithio. Due to issues with Microsoft servers, we are currently unable to receive any emails or access messages left on the school's answering machine. The school phone is working
Diolch yn fawr i Rhiannon a Dawn o Fanc Bwyd Aberteifi am ymweld â ni heddiw a rhannu gwybodaeth mor ddiddorol a phwysig am waith y Banc Bwyd. Diolch o galon hefyd i'n teuluoedd am eu rhoddion hael tuag at y Banc Bwyd. ‐------------- Thank you to Rhiannon and Dawn from Cardigan Foodbank for visiting us today and sharing such interesting and important information about the vital work food banks do in our community. A heartfelt thank you to our families who donated items for the Foodbank.
Bwydlen yr wythnos
